.....ගිලන් රථය සහ කොබෙයි ප්‍රේමය...

බිජුලන දින අදයි තිර වී තිබුනි ඇගේ
ආවේ කෑම සොයාගෙනයි පාර දිගේ..
එනමුදු දෙවිඳු උදුරාලා සතුට මගේ
මඟමරු වෙලා බිලිගත්තා බිරිඳ මගේ..

"තඩ්" හඬ නඟා ගැටුනා ඇය ඒ රියට
විසිවී ගිහින් වැටුනා පාරෙන් එපිට...
හිතා ගන්න බැරිවුනි සිද්දිය මෙමට
පියෑඹුනෙමි ඉබේම මා ඈ වෙතට..

විඳි වේදනාවන් පිලිබිඹු වන මුව ය
ලේ නැහැ බිඳුවකුත් දේහය නිසසලය..
හුස්මන් නොවැටෙනා පිහාටු පිරි ලැම ය
වෙන්දා මෙන්ම තවමත් ඇය ලස්සන ය...

සතුටෙන් ඉමුය පැටවුන් තිදෙනෙක් හදලා
ඊයේ රෑත් කිව්වා මට තුරුලු වෙලා..
කොහොමද සිටින්නේ මා මතු තනි වීලා
දෙවියනි මරනු මැන  මාවත් ලය පලලා..

ඇදිලා එතිය කුහුඹුන් දැන් නුඹේ වෙත
හපනව දැනෙයි උන් පණ ඇති මගෙත් ගත..
තබා ගෙනම මා හිස නුඹෙ පපුව මත
මිය යමි කුහුඹුනේ එනු මැන මගේ වෙත....

-ගිලන් රථ රියදුරාගේ සිතිවිලි -

රැකියාවට බැඳී අවුරුදු තිස් පහකි
අනතුරු අදට සිදුවී ඇත්තේ පහකි..
බල්ලන් තුනකි පූසෙකි එක කුරුල්ලෙකි
අද වුනු අනතුරට හිත වාවනු නොහැකි....

ඉක්මන් නොකල නම් මා අද ගියා වගේ
බේරා ගන්න බැරි වනු ඇත දරුව ඇගේ..
රැකගත් නමුත් දරුවත් ප්‍රාණයත් ඇගේ
බැරි වුනි දිවිය බේරන්නට කොබෙයියගේ..

අද රෑ කොබෙයියෙක් තනිවම හිඳිනු ඇත
කඳුලින් කැදැල්ලම ඔවුන්ගෙ පෙඟෙනු ඇත..
කාගේ නමුත් පණ නම් මට අගේ ඇත
පිනක් කල නමුත් - අද "හිස්" මගේ හිත....